Fewzi Bilge

Bi şev mêrdîn stêrik e

Çîrokên nû ên Fewzî Bîlge bi navê ‘Bi şev Mêrdîn stêrik in’ di nav weşanên Avesta de derket.

Bi roj Mêrdîn gerdeniyeke zêr e. Li ber tava rojê arekî li ber bê ku çirûsk jê dipekin, weke teyrê tawisekî spî ku perê xwe vekiribe û dabe tîna tavê ye. Bi şev Mêrdîn stêrk in. Riya kadizkê ye carinan Mêrdîn. Rûyekî nepen e…
...Bi şev Mêrdîn stêrk in. Bi xaniyên kevirê spî û neqişandî, dîmenên ji dilê dîrokê reviyayî, bi bêhna xwe ya nepen, bi rengê mirovên xwe yên esmer Mêrdîn bi şev esmer e. Weke “Labîrenta Pan”, kolanên wê yên teng, bêhna lewanta, qaqule, kuncî, şekirê behîvên Mêrdînê ye, Mêrdîn.
Mêrdîn ciyê ku mirov li evînê diqewime, li rastiyê diqelibe û di rastiyê de digewime ye.
Bi şev Mêrdin stêrk in. Gerdeniyeke mircan, bişirîneke şêrîn, xewneke xweş, ramûsaneke germ a qîzikeke file, suryanî, keldanî, êzdî, kurd an jî ereb e Mêrdîn.
...Cumek benîştê Elkê, di nava destmala xwişka min de, qutiyek çaya Seylanê ya qaçax di paxila diya min de veşartiye ye. Çend kîlo titûna Xursê, çend kiruse pelên cixarê yên binya xetê, di nava qumatka birakê min ê piçûk de veşartiye ye Mêrdîn.

FEWZÎ BÎLGE

Di sala 1962an de li Mêrdînê, li Dêrika Çiyayê Mazî hatiye dinyayê. Di heman salê de malbata wî koçî Qoserê kirine. Heya perwerdahiya xwe ya lîseyê qedandiye li wê derê maye. Piştî wê koçî Stenbolê kirine û di 1978an de li Unîversîteya Stenbolê beşa edebiyatê, Unîversîteya Marmarayê beşa zanistiyên civakî jî di sala 1987an de qedandiye. Demdemî jî di ajansên girafîkî de xebitiye.
Ji wêjevanekî bêtir weke wenesaz tê naskirin û hezkirin. Wî li çar aliyên welêt ser 30 pêşangehên takeserî û bi dehan yên hevbeş li dar xistiye. Şeş-heft sala di navêndên çand û hunerî de di gelek beşan de, taybetî jî di beşên hunerê şêwekarî de berbirsiyarî girtiye. Gelek nivîs û xebatên wî yên wêneyan di kovar û rojnameyên, weke Nûdem, Pelîn, Roj, Medya Gûneşî, Jiyana Rewşen, Kevan, Çirûsk, Kovara W, Tîroj, Evrensel û wd de hatine weşandin.
Çend salên dawiyê li Batmanê dijî, di kargeha xwe ya hunerên şêwekarî “Soresor”ê de gelek şagirt gihandine.
Kitêbên wî yên hatine çapkirin
- Jidilara (W. Sî, 2002)
- 29+1 (W. Belkî, 2005)
- Dîn in (W. Belkî, 2006)
- Qahpikên kuçeyan (W. Belkî, 2007)

Bi şev mêrdîn stêrik e
Fewzî Bîlge
(çîrok)
ISBN: 978-9944-382-59-5
19.5x13, 112 rûpel